சன் பிக்சர்ஸ் தயாரிக்க, லோகேஷ் கனகராஜ் இயக்கத்தில் சூப்பர் ஸ்டார் ரஜினிகாந்த் நடிக்கும் திரைப்படம் ‘கூலி'. கடந்த மாதம் ஐதராபாத் தொடங்கி தற்போது படத்தின் ஷூட்டிங் விசாகப்பட்டிணத்தில் நடைபெற்றுவருகிறது. படப்பிடிப்பில் கலந்துகொள்வதற்காக நேற்று ரஜினிகாந்த் ஆந்திரா போன நிலையில், நாளை படத்தில் யார் யாரெல்லாம் நடிக்கிறார்கள் என அதிகாரப்பூர்வமாக அறிவிக்கப்பட இருக்கிறது.
கமல்ஹாசனின் மூத்த மகள் ஸ்ருதி ஹாசன் ‘கூலி' படத்தில் ரஜினிகாந்த்தின் மகளாக நடித்துக்கொண்டிருக்கிறார். இதுத்தவிர கன்னடத்தின் முன்னணி நடிகர் உபேந்திராவும் ‘கூலி' படத்தில் நடிக்கிறார். இது தவிர பல சின்னத்திரை நடிகர்களும் ‘கூலி' படத்தில் நடித்துக்கொண்டிருக்கும் நிலையில் நாளை நடிகர்களின் பட்டியல் அதிகாரப்பூர்வமாக அறிவிக்கப்பட இருக்கிறது.
இந்நிலையில் இயக்குநர் நெல்சன் ‘ஜெய்லர்' படத்தில் மற்ற தென்னிந்திய மாநிலங்களின் முன்னணி நடிகர்களை கேமியோ ரோலில் நடிக்கவைத்த நிலையில், லோகேஷும் ‘கூலி' படத்தில் இந்தி நடிகர் அமீர் கானை நடிக்கவைக்க பேச்சுவார்த்தை நடத்தியிருப்பதாகச் சொல்லப்படுகிறது. அமீர் கான் உண்மையிலேயே ‘கூலி' படத்தில் நடிக்கிறாரா இல்லையா என்பது நாளை மாலை 6 மணிக்குத் தெரிந்துவிடும்!