கடவுளை மையப்படுத்திய ஃபேண்டஸி கதைகள் அதிகம் வர ஆரம்பத்திருக்கிறது. இதில் தெலுங்கு நடிகர் சிரஞ்சீவியும் இணைந்திருக்கிறார். வசிஷ்டா இயக்கத்தில் உருவாகி இருக்கும் இந்தப் படத்தில் த்ரிஷா கதாநாயகியாக நடித்திருக்கிறார். விடுமுறை தினத்தை முன்னிட்டு இந்தப் படத்தின் டீசர் தற்போது வெளியாகியுள்ளது. பிரபஞ்சத்திற்கு அப்பாற்பட்ட ஒரு மாய நிலப்பரப்பில் டீசர் துவங்குகிறது. மீன் வடிவ பறவைகள் வானத்தில் பறக்க, கர்ஜிக்கும் காண்டாமிருகங்கள் அங்கு உலவுகிறது. ஒரு தீய சக்தி இந்த சாம்ராஜ்யத்தின் நல்லிணக்கத்தைச் சீர்குலைக்க அச்சுறுத்துகிறது. என்ன நடக்கும்... காலம் தான் அந்த கேள்விக்குப் பதிலளிக்க வேண்டும்.
இந்த இருளை எதிர்கொள்ள முன் எப்போதும் இல்லாத வகையில் ஒரு நாயகன் உதயமாகிறான். ஒரு இளம் பெண் வரவிருக்கும் போரைப் பற்றி அறிய முற்பட்ட உடனேயே, சிரஞ்சீவி ஒரு சூப்பர் ஹீரோவைப் போல, பறக்கும் குதிரையில் சவாரி செய்கிறார். டீஸர் சிரஞ்சீவியின் அதிரடி காட்சிகளைக் காட்டுகிறது. டீசர் முடிவில் அவர் தனது எதிரிகளுக்கு எதிராக ஒரு சூலாயுதத்தைப் பயன்படுத்துகிறார். இது அவருக்கு வழிகாட்டும் தெய்வீக வலிமையைக் குறிக்கும் ஹனுமான் சிலையால் வடிவமைக்கப்பட்டுள்ளது.
தீய சக்திகளை எதிர்க்கும் சூப்பர் ஹீரோ கதையை தெய்வீக பாணியில் கலந்து எடுத்திருக்கிறார்கள். மாய உலகில் பேன்ட்-ஷர்ட் போட்டுக் கொண்டு சிரஞ்சீவி செய்யும் சாகசங்கள் எல்லாம் பார்க்கும்போதே அயர்ச்சியை வரவழைக்கின்றன. 'அதே டெய்லர், அதே வாடகை' பாணியில் எடுக்கப்பட்ட இந்த சூப்பர் ஹீரோ கதையின் முடிவு என்னவாக இருக்கும் என்பதும் வெட்ட வெளிச்சம். படத்தின் பிரமாண்டத்திற்காக சிரஞ்சீவி ரசிகர்களாக இருந்தால் இந்தப் படம் பார்த்து ரசிக்க வாய்ப்புண்டு.