‘விடாமுயற்சி' ஃபர்ஸ்ட் லுக் போஸ்டர்... 'பாரதி கண்ணம்மா' சீரியலுடன் ஒப்பிட்டு கலாய்க்கும் மீமர்ஸ்!

‘லைகா’ எனும் மொபைல் சேவை நிறுவனத்தை இங்கிலாந்தில் நடத்திவருகிறார் சுபாஷ்கரன். இலங்கைத் தமிழரான இவருக்கு சினிமாவில் அதிக ஆர்வம் உண்டு. முன்னர் தமிழ்ப்படங்களின் வெளிநாட்டு உரிமைகளை வாங்கி விற்றுக்கொண்டிருந்தவர், விஜய்யின் ‘கத்தி' படத்தின் மூலம் தமிழ் சினிமாவுக்குள் நேரடியாக தயாரிப்பாளராக அறிமுகமானார். 

மணிரத்னத்தின் ‘பொன்னியின் செல்வன்’ தொடங்கி ரஜினியின் ‘தர்பார்’, கமல்ஹாசனின் ‘இந்தியன் - 2’ வரை பிரமாண்டமான பல படங்களைத் தயாரித்துவிட்டது லைகா. இப்போது இந்நிறுவனத்தின் தயாரிப்பில் ரஜினியின் ‘வேட்டையன்’ படமும், அஜித்தின் ‘விடாமுயற்சி' படமும் ஷூட்டிங்கில் இருக்கிறது.

‘பொன்னியின் செல்வன்’, ‘லால் சலாம்' ‘இந்தியன் -2’ என லைகாவின் சமீபத்திய படங்கள் அவர்களின் பட்ஜெட்டைத் தாண்டிப்போனதால் லைகா அஜித்தின் ‘விடாமுயற்சி', ரஜினியின் ‘வேட்டையன்' படங்களில் காஸ்ட் கட்டிங் நடவடிக்கைகளில் ஈடுபட்டதாக பிரச்சனைகள் எழுந்தது. இதனால் ஒருகட்டத்தில் கடுப்பான அஜித்குமார் முழு சம்பளமும் கொடுத்தால்தான் நடிப்பேன் எனச்சொல்லி, அடுத்தப்படமான ‘குட் பேட் அக்லி' படத்துக்கு கால்ஷீட் கொடுத்துவிட்டார். ‘குட் பேட் அக்லி' 2025 பொங்கல் ரிலீஸ் என அறிவிப்பையும் வெளியிடவைத்துவிட்டார். இதனால் லைகா இந்த ஆண்டு தீபாவளிக்கு ‘விடாமுயற்சி' படத்தை ரிலீஸ் செய்தே ஆகவேண்டும் என்கிற கட்டாயத்துக்குத் தள்ளப்பட, அஜித்திடம் டீல் பேசி சூழலை சுமூகமாகி அஜர்பைஜானில் மீண்டும் விடாமுயற்சி ஷூட்டிங்கையும் தொடங்கிவிட்டது.

இன்று ‘விடாமுயற்சி' படத்தின் ஃபர்ஸ்ட் லுக்கை வெளியிட்டிருகிறது லைகா. போஸ்டரில் அஜித் ஒரு நெஞ்சாலையில் பணம் அடங்கிய பையை தூக்கிக்கொண்டு ஒரு முடிவோடு நடக்கும் காட்சி இடம்பெற்றிருக்கிறது. முயற்சி திருவினையாக்கும் என்பதுடன் விடாமுயற்சி திருவினையாக்கும் என எழுதியிருக்கிறார்கள்.  அதோடு ''அவர் பாதையில்...'' என்கிற வாசகமும் இடம்பெற்றிருக்கிறது. இந்த போஸ்டரை விஜய் டிவியின் 'பாரதி கண்ணம்மா' சீரியலோடு ஒப்பிட்டு ட்ரோல் செய்யும் மீம்களும் சுற்ற ஆரம்பித்திருக்கின்றன.

ஃபர்ஸ்ட் லுக் போஸ்டரில் அதிகாரப்பூர்வமாக சன் டிவி சேட்டிலைட் உரிமையை வாங்கியிருப்பதையும், நெட்ஃபிளிக்ஸ் ஓடிடி உரிமையை வாங்கியிருப்பதையும் அறிவித்திருக்கிறது. செப்டம்பரில் வெளியாகயிருக்கும் விஜய்யின் 'கிரேட்டஸ்ட் ஆஃப் ஆல் டைம்' படத்தை வாங்காமல் தவிர்த்த சன் டிவி, அஜித்தின் படத்தை வாங்கியிருப்பது குறிப்பிடத்தக்கது.

விடாமுயற்சி ஃபர்ஸ்ட் லுக்கில் தீபாவளி ரிலீஸ் என்கிற அறிவிப்பு வெளியாகும் என எதிர்பார்க்கப்பட்ட நிலையில் ரிலீஸ் தேதியை லைகா கமிட் செய்யவில்லை!