மாரி செல்வராஜ் இயக்கத்தில் கடந்த ஆகஸ்ட் 23-ம் தேதி வெளியான ‘வாழை’ திரைப்படம் இந்த ஆண்டின் மிகப்பெரிய வெற்றி படங்களில் ஒன்றாக அமைந்துள்ளது. இப்படத்தில் கலையரசன், நிகிலா விமல், திவ்யா துரைசாமி மற்றும் பலர் முக்கியக் கதாபாத்திரங்களில் நடித்திருந்தனர். சந்தோஷ் நாராயணன் இசையமைக்க, மாரி செல்வராஜ் ஹாட்ஸ்டார் நிறுவனத்தோடு இணைந்து தயாரித்துள்ளார்.
ரசிகர்களின் பாராட்டுகளால் படத்துக்கு வரும் கூட்டம் நாளுக்கு நாள் அதிகமாகிக் கொண்டே சென்றது. மூன்றாவது வாரத்திலும், GOAT ரிலீஸுக்குப் பின்னரும் கணிசமான திரையரங்குளில் இந்த படம் திரையிடப்படுவதே இதன் வெற்றியை காட்டுகிறது. இதையடுத்து சமீபத்தில் படக்குழுவினர் 25-ஆவது நாள் வெற்றி விழாவைக் கொண்டாடினார்கள்.
தற்போது வாழை திரப்படம் கிட்டத்தட்ட தன்னுடைய திரையரங்கு ஓட்டத்தை முடிக்க உள்ளது. இந்நிலையில் திரையரங்குகள் மூலமாக வாழை திரைப்படம் 33 கோடி ரூபாய் வசூல் செய்திருப்பதாக சொல்லப்படுகிறது. இதன் மூலம் மிகக்குறைந்த பட்ஜெட்டில் இந்த படம் உருவாக்கப்பட்டு மிகப்பெரிய அளவில் வசூல் செய்து இந்த ஆண்டின் மிகப்பெரிய பிளாக்பஸ்டர் படமாக வெற்றிப்பெற்றுள்ளது.
இந்நிலையில் இந்த படம் செப்டம்பர் மாத இறுதியில் ஓடிடியில் ரிலீஸாகும் என தகவல்கள் வெளியாகி இருந்தது. ஆனால் இப்போது அக்டோபர் 11-ம் தேதிக்கு மாற்றப்பட்டுள்ளது. இது சம்மந்தமான அறிவிப்பை டிஸ்னி ப்ளஸ் ஹாட்ஸ்டார் நிறுவனம் அதிகாரப்பூர்வமாக எக்ஸ் தளத்தில் அறிவித்துள்ளது.