இசையமைப்பாளர் யுவன் ஷங்கர் ராஜாவின் இசை நிகழ்ச்சி 'U1Long drive Concert 'வரும் ஜூலை 27-ம் தேதி சென்னை நந்தனத்தில் நடைபெறுகிறது. கடந்த ஆண்டு நடந்த ஏ.ஆர்.ரஹ்மான் இசை நிகழ்ச்சியில் கூட்ட நெரிசலால் பல்வேறு பிரச்சனைகள் நடந்த நிலையில் ‘’நெரிசல் பிரச்சனைகள் எதுவும் இருக்காது. 360 டிகிரி அரங்கில் இந்தமுறை இசை நிகழ்ச்சி நடக்கிறது'’ என பத்திரிகையாளர் சந்திப்பில் பேசியிருக்கிறார் யுவன் ஷங்கர் ராஜா.
கான்செர்ட்டில் 36 பாடல்கள் பாட இருப்பதாகவும், இதில் பாதி பாடல்களை தான் பாட இருப்பதாகவும், இசை விழாவுக்கு அப்பா இளையராஜாவையும் கூப்பிட்டு பார்க்கப்போகிறேன் என்றும் பேசியிருக்கிறார் யுவன். பத்திரிகையாளர்களின் பல்வேறு கேள்விகளுக்கு பதில் அளித்து பேசிய யுவன் ‘’எல்லா பாடல்களுக்கும் ஒரே மாதிரியாதான் வொர்க் பண்றேன். சில பாடல்கள் ஹிட் ஆகுது. சில பாடல்கள் ஹிட் ஆகுறதுல்ல. ஹிட் ஆகாத பாடல்கள் ஏன் ஹிட் ஆகலைன்னு போய் கமென்ட்ஸ்ல பார்ப்பேன். அதுல இருந்து அடுத்தப்பாட்டுக்கு வொர்க் பண்ணுவேன்'’ எனப் பேசியிருக்கிறார் யுவன்.