கிராமத்து களத்தில் மீண்டும் கார்த்தி; ‘மெய்யழகன்’ பட டிரெய்லர் வெளியானது!

’96’ படப்புகழ் இயக்குநர் பிரேம்குமார் இயக்கத்தில் உருவாகியுள்ள திரைப்படம் ‘மெய்யழகன்’. நடிகர்கள் கார்த்தி, அரவிந்த்சாமி, ராஜ்கிரண், ஸ்ரீவித்யா உள்ளிட்டப் பலர் இந்தப் படத்தில் நடித்துள்ளனர். தஞ்சாவூரை கதைக்களமாகக் கொண்டு உருவாகியுள்ள இந்தப் படத்தில் மாமன்- மச்சான் இடையே இருக்கும் அன்பையும் அவர்களது உறவையும் இந்தப் படம் அழகாக படம் பிடித்து காட்டியுள்ளது. ‘பருத்திவீரன்’ படத்திற்குப் பிறகு இந்தப் படம் பார்த்துதான் நடிகர் கார்த்தியை கட்டிப் பிடித்து மகிழ்ந்ததாக நடிகர் சூர்யாவும் இந்தப் படத்தின் விழா மேடையில் தெரிவித்தார்.

வெள்ளந்தியாக, ஓயாமல் வாய் பேசும் கலகலப்பான கதாபாத்திரத்தில் கார்த்தியும், அமைதியாக, உணர்வுகளை கட்டுப்படுத்தும் நபராக அரவிந்த்சாமியும் பிரதான கதாபாத்திரங்களில் நடித்துள்ளது டிரெய்லரில் தெரிகிறது. ‘96’ படத்திற்குப் பிறகு இந்தக் கதையை தனக்கு கொடுக்காமல் பிரேம்குமார் வைத்திருந்ததாகவும் அதை தானே கேட்டுப் பெற்று இந்தப் படத்தில் நடித்ததாகவும் கார்த்தி தெரிவித்திருந்தார்.

‘96’ படத்திலேயே இருவருக்கிடையே இருக்கும் அன்பை அழகாக படம் பிடித்துக் காட்டியவர் பிரேம்குமார். அதேபோன்ற அழகான அன்பு கார்த்தி- அரவிந்த்சாமிக்கு இடையே இருக்கிறது என்பது டிரெய்லர் காட்சிகள் பார்க்கும்போதே தெரிகிறது எனவும் படத்தின் வெளியீட்டிற்காக காத்திருப்பதாகவும் ரசிகர்கள் கூறி வருகின்றனர்.