'GOAT' விஜய்யைத் தொடர்ந்து மற்றொரு முன்னணி ஹீரோவுடன் இணையும் நடிகர் பிரசாந்த்... யார் அந்த ஹீரோ?!
வெங்கட்பிரபு இயக்கத்தில் நடிகர்கள் விஜய், பிரபுதேவா, பிரசாந்த் உள்ளிட்டப் பலர் நடித்திருந்த திரைப்படம் 'GOAT'. கடந்த வாரத்தில் வெளியான இந்தப் படம் கிட்டத்தட்ட 200 கோடி ரூபாய்க்கும் அதிகமாக வசூல் செய்துள்ளது. தமிழில் வரவேற்பைப் பெற்ற அளவுக்கு தெலுங்கில் வரவேற்பு பெறவில்லை எனவும் அதற்கு காரணமாக படத்தின் கிளைமாக்ஸில் இடம்பெற்ற சிஎஸ்கே கிரிக்கெட் அணி மற்ற மொழி பார்வையாளர்களை கவரவில்லை என்றும் சொல்லியிருந்தார் வெங்கட்பிரபு.
இந்தப் படத்தில் விஜய், பிரபுதேவா, பிரசாந்த் ஆகியோரின் கூட்டணியும் இவர்கள் மூவரின் குறும்புகளும் ரசிகர்களைக் கவர்ந்த விஷயமாக இருந்தது.
இந்தப் படத்திற்குப் பிறகு நடிகர் சூர்யாவுடன் நடிகர் பிரசாந்த் இணைந்து நடிக்கப் போவதாகத் தகவல் வெளியாகியுள்ளது. கார்த்திக் சுப்பராஜ் இயக்கத்தில் நடிகர் சூர்யா தற்போது தனது 44-வது படத்தில் நடித்து வருகிறார். ஊட்டி, சென்னை என இதன் படப்பிடிப்பு நடந்து வருகிறது.
சூர்யா ஜோடியாக பூஜா ஹெக்டே நடிக்கிறார். இந்தப் படத்தில் இடம்பெறும் பாடல் ஒன்றிற்கு நடிகை ஸ்ரேயா நடனம் ஆடியிருப்பதாகவும் சொல்லப்படுகிறது. இந்த கலக்கல் கூட்டணியில் நடிகர் பிரசாந்த் இணைந்திருக்கும் தகவல் ரசிகர்களை உற்சாகப்படுத்தியுள்ளது.
