நடிகர் விஜய்யின் ‘GOAT’ முதல் நாள் வசூல் என்ன... 1000 கோடி ரூபாயை நெருங்குமா?!

இயக்குநர் வெங்கட்பிரபு இயக்கத்தில் நடிகர்கள் விஜய், சிநேகா, லைலா, பிரசாந்த், பிரபுதேவா உள்ளிட்டப் பலர் நடிப்பில் ‘GOAT’ திரைப்படம் நேற்று உலகம் முழுவதும் திரையரங்குகளில் வெளியானது. மறைந்த நடிகர் விஜயகாந்த், த்ரிஷா, சிவகார்த்திகேயன் என படத்தின் கேமியோக்கள் ரசிகர்களை உற்சாகப்படுத்தியுள்ளது.

அதுபோல, பட ரிலீஸுக்கு முன்பு அதிகம் விமர்சனத்திற்குள்ளான விஜய்யின் மகன் கதாபாத்திரத்தின் டீஏஜிங் லுக்கும் பெரும்பாலான ரசிகர்களை இப்போது திருப்திப்படுத்தியுள்ளது. படத்திற்கு முந்தைய பேட்டிகளில் படம் ஆயிரம் கோடி வரை வசூலிக்கும் என இதன் நடிகர்கள் கூறினர். இதனால், ரசிகர்கள் சிலரும் இணையத்தில் விஜயின் ‘GOAT’ அந்த சாதனையை உருவாக்குமா என ஆர்வத்துடன் இருந்தனர்.

உலகம் முழுவதும் இந்தப் படம் வெளியாகி இருந்தாலும் வட இந்தியாவின் மல்டிபிளக்ஸ் திரையரங்குகளில் ‘GOAT’ ரிலீஸாகவில்லை என்பது குறிப்பிடத்தக்கது. அங்கு ஒரு படத்தை வெளியிட்டால் 8 வாரங்கள் கழித்தே படத்தை ஓடிடியில் வெளியிட வேண்டும். ஆனால், முன்பே நெட்ஃபிலிக்ஸ் ஓடிடி தளத்துடன் செய்து கொண்ட ஒப்பந்தம் காரணமாக 4 வாரங்களில் படம் ஓடிடிக்கு வர வேண்டும் என்பதால் வட இந்திய மல்டிபிளக்ஸில் வெளியாகவில்லை என்பது குறிப்பிடத்தக்கது.

இந்நிலையில், உலகம் முழுவதும் ‘GOAT’ திரைப்படம் முதல் நாளில் 73 கோடி ரூபாயை மட்டுமே வசூலித்துள்ளது ரசிகர்களை ஏமாற்றம் அடையச் செய்துள்ளது. தமிழ்நாட்டில் ரூ. 38 கோடியும், ஆந்திரா, தெலுங்கானாவில் ரூ. 5 கோடியும், மலையாளத்தில் ரூ. 2 கோடியும், இந்தியில் ரூ. 1.7 கோடியும் வசூலித்துள்ளது GOAT.