'GOAT' படத்தின் சிறப்பு காட்சிகள் ரத்து... ரசிகர்கள் ஏமாற்றம்!

இயக்குநர் வெங்கட்பிரபு இயக்கத்தில் நடிகர்கள் விஜய், சிநேகா, லைலா, பிரபுதேவா, பிரஷாந்த் உள்ளிட்டப் பலர் நடித்திருக்கும் 'GOAT' திரைப்படம் வருகிற ஐந்தாம் தேதி திரையரங்குகளில் வெளியாக இருக்கிறது. நடிகர் விஜய் படம் என்பதால் சிறப்புக் காட்சிகளுக்கும் தமிழக அரசு அனுமதி வழங்கி இருக்கிறது. ஆனால், கிட்டத்தட்ட 80 சதவிகித தியேட்டர்கள் 'GOAT' படத்தின் சிறப்பு காட்சிகளை ரத்து செய்திருப்பது ரசிகர்களை ஏமாற்றம் அடையச் செய்திருக்கிறது.

சிறப்பு காட்சி திரையிட டிக்கெட் ஒன்றிற்கு 700 முதல் 800 ரூபாய் வரை விநியோகஸ்தர்கள் கேட்பதாகவும் அவர்களின் நெருக்கடியாலேயே சிறப்பு காட்சிகளை ரத்து செய்வதாகவும் பல திரையரங்குகள் அறிவித்திருக்கின்றன.

குறிப்பாக, இன்று சென்னையில் உள்ள பிரபல திரையரங்கு ஒன்றில் 'GOAT' படத்திற்கான டிக்கெட் முன்பதிவு விற்பனை தொடங்கிய இரண்டு மணி நேரத்திற்குள்ளாகவே அனைத்து டிக்கெட்களும் விற்று தீர்ந்தது குறிப்பிடத்தக்கது. 'GOAT' படத்தில் நடிகர் விஜய் மூன்று கதாபாத்திரத்தில் நடித்திருக்கிறார். சிநேகா அவரது மனைவியாக நடித்திருக்கிறார். யுவன் இசையமைத்திருக்கும் இந்தப் படத்தில் அஜித் ரெஃபரன்ஸ் இருப்பதாகவும், அஜித் நடிக்கும் ‘குட் பேட் அக்லி’ படத்தில் விஜய் ரெஃபரன்ஸ் இருக்கிறது எனவும் சஸ்பென்ஸ் உடைத்திருக்கிறார் வெங்கட்பிரபு. மேலும், ’கேப்டன்’ விஜயகாந்த் லுக்கையும் இதில் ஏஐ மூலம் கொண்டு வந்திருக்கிறார்கள்.