சாதியும் மதமும் சொல்லித் தராததை பயணம் சொல்லிக் கொடுக்கும்; வைரலாகும் அஜித் வீடியோ!
பைக் பயணம் செய்வது, விமானம் ஓட்டுவது, துப்பாக்கி சுடுதல் போன்றவற்றில் தீவிர ஆர்வம் கொண்டவர் நடிகர் அஜித். படப்பிடிப்பின் ஷெட்யூல் பிரேக் கிடைக்கும் போதெல்லாம் பைக்கில் பயணம் கிளம்பி விடுவார். இந்தியாவில் உள்ள முக்கிய இடங்கள் அனைத்திற்கும் பைக்கில் பயணப்பட்டுள்ளார். அது தொடர்பான புகைப்படங்களும் இணையத்தில் வைரலாகும். தற்போது ‘ஏகே மோட்டார் ரைட்ஸ்' என்ற பெயரில் பைக் பயணம் செய்ய விரும்புவர்களை ஒருங்கிணைத்து வருகிறார். இந்த நிலையில், அஜித் பயணம் செய்வது ஏன் முக்கியம் என்று பேசும் வீடியோ ஒன்று ரசிகர்களின் கவனத்தை ஈர்த்துள்ளது.
அஜித்தின் மேலாளர் சுரேஷ் சந்திரா பகிர்ந்திருக்கும் அந்த வீடியோவில் ”இந்த உலகம் பலவிதமான கலாசாரங்களால் நிறைந்தது. பயணம் செய்யும்போது நீங்கள் இன்னும் மேம்பட்ட மனிதர்களாக மாறுவீர்கள். சாதியும், மதமும் சில முன் முடிவுகளைக் கொடுத்து மனிதர்களை வெறுக்க வைக்கலாம். ஆனால், பயணம் அதை எல்லாம் மாற்றி உங்களைப் பக்குவப்பட வைக்கும். பல கலாசாரங்களைக் கடந்து நீங்கள் புதிய விஷயங்கள் கற்றுக் கொள்ளும்போது புதிய மனிதர்களாக இருப்பீர்கள்” என்று அதில் பேசியிருக்கிறார்.
நீண்ட நாட்கள் கழித்து அஜித் பேசியிருக்கும் வீடியோ என்பதாலும் குறிப்பாக அரசியல் விஷயத்தை அவர் எளிமையாகவும் உறுதியாகவும் சொல்லியிருக்கிறார் என்பதாலும் இந்த வீடியோவை ரசிகர்கள் தீயாய் பரப்பி வருகின்றனர்.
