பிக் பாஸ் தமிழ் செட்டில் நடந்த திடீர் விபத்து!

பிக் பாஸ் தமிழ் நிகழ்ச்சியின் எட்டாவது சீசன் அடுத்த மாதம் 6ம் தேதி தொடங்க இருக்கிறது. சர்ச்சை, மகிழ்ச்சி, பஞ்சாயத்து என பரபரப்புகளுக்கு பஞ்சமில்லாத இந்த நிகழ்ச்சி பல பார்வையாளர்களுக்குப் பிடித்த ஒன்றாகவே இருக்கிறது.

கடந்த ஏழு சீசன்களை தொகுத்து வழங்கிய நடிகர் கமல்ஹாசன் இந்த 8வது சீசனில் முன்பே ஒப்புக் கொண்ட படங்கள் காரணமாக விலகி இருக்கிறார். அவருக்குப் பதிலாக நடிகர் விஜய்சேதுபதி இந்த எட்டாவது சீசனை தொகுத்து வழங்குகிறார்.

இதற்கான புரோமோவும் வெளியானது. இந்த எட்டாவது சீசனின் போட்டியாளர்களாக நடிகர்கள் ரஞ்சித், குரேஷி, அருண், விடிவி கணேஷ் உள்ளிட்டப் பலரது பெயர்களும் பட்டியலில் இருக்கிறது. இந்த நிலையில், எட்டாவது சீசனுக்கான செட் அமைக்கும் பணி சென்னை ஈவிபி ஃபிலிம் சிட்டியில் விறுவிறுப்பாக நடந்து வருகிறது.

இதில் பணியில் இருந்த உத்திரபிரதேசத்தை சேர்ந்த முகமது ஷாகின் கான் என்ற தொழிலாளி 20 அடி உயரத்தில் இருந்து கீழே விழுந்திருக்கிறார். இதில் கை, இடுப்பு மற்றும் எலும்பு உடைந்து விபத்து ஏற்பட்டிருக்கும் விஷயம் அதிர்ச்சியை ஏற்படுத்தி இருக்கிறது.