விஜய் - பவதாரிணியின் குரலில், யுவனின் இசையில்... GOAT பட ''சின்ன சின்னக் கண்கள்'' பாடல் விமர்சனம்!

சினிமா ரசிகர்களால் அதிகம் எதிர்பார்க்கப்பட்ட விஜய்யின் ‘GOAT’ படத்தின் ‘’சின்ன சின்னக் கண்கள் சிரிக்கிறதோ… கருவறை மீண்டும் மணக்கிறதோ’ பாடல் வெளியாகியிருக்கிறது. யுவன் ஷங்கர் ராஜா இசையில், கபிலன் வைரமுத்துவின் பாடல் வரிகளுக்கு தங்கள் குரல்களால் உயிர்கொடுத்திருக்கிறார்கள் இளையராஜாவின் மகளும், சமீபத்தில் மறைந்த பின்னணிப் பாடகியுமான பவதாரிணியும், நடிகர் விஜய்யும். மறைந்த பவதாரிணியின் குரலை ஆர்ட்டிஃபிஷியல் இன்ட்டெலிஜென்ஸ் உள்ளிட்ட தொழில்நுட்பம் மூலம் மறுஉருவாக்கம் செய்திருக்கிறார் யுவன் ஷங்கர் ராஜா. 

யுவனின் இசை எப்படி?

இது யுவன் ஷங்கர் ராஜாவின் இசையில் உருவாகியிருக்கும் பாடல் என்பதை முதல் நோட்டே சொல்லும் வகையில் அவரது சிக்னேச்சர் ஸ்டைலில் உடனடியாக கவனைத்தை ஈர்க்கும் ஒரு இனிமையான மெல்லிசையுடன் பாடல் தொடங்குகிறது. கிட்டார் மற்றும் ஸ்ட்ரிங் இசைக்கருவிகளுடன், எலெக்ரிக் பீட்களையும் ஒருங்கிணைத்து ஒரு மாடர்னான அதே சமயம் 90’ஸின் நாஸ்டால்ஜிக் ஃபீலையும் இணைத்துத் தந்திருக்கிறார் யுவன். இது ஒரு ஃபிளாஷ்பேக் பாடல் என்கிற உணர்வை இசை தந்துவிடுகிறது. ‘’சின்ன சின்ன கண்கள்’’ பாடலை கேட்டு முடித்தப்பிறகும் மீண்டும் ஒருமுறை திரும்பக் கேட்கலாம் என்கிற தூண்டுதலைத் தருகிறது யுவனின் இசை. 

கபிலன் வைரமுத்துவின் பாடல் வரிகள் மற்றும் குரல்!

கபிலன் வைரமுத்துவின் எளிமையும் ஆழமும் கலந்து எழுதப்பட்ட பாடல் வரிகள், அன்பு மற்றும் போற்றுதலின் சாரத்தை அழகாகவும், ஆழமாகவும் எடுத்துரைக்கிறது. "சின்ன சின்ன கண்கள்" என்ற சொற்றொடர் மீண்டும் மீண்டும் ஒரு மெல்லிய வசீகரத்துடன், பாடலின் மறக்கமுடியாத ஹூக்காக அமைந்திருக்கிறது. இந்தப் பாடலின் மற்றொரு சிறப்பம்சம் குரல். தொழில்நுப்டம் மூலம் உருவாக்கப்பட்டிருந்தாலும் பவதாரிணியின் குரலும், நடிகர் விஜய்யின் குரலும் பாடல் வரிகளில் ஆழமாகப் புதைந்துள்ள உணர்வுகளை கச்சிதமாக வெளிப்படுத்துகிறது. வார்த்தைகளின் உச்சரிப்பும் இவர்களது குரல்களில் தெளிவாக, தீர்க்கமாக எதிரொலிக்கிறது.

ரிப்பீட் ப்ளீஸ்!

‘GOAT’ எனும் ‘கிரேட்டஸ்ட் ஆஃப் ஆல் டைம்’ படத்தின்  ஆல்பத்தில் "சின்ன சின்ன கண்கள்" மிக முக்கியமான பாடலாக இருக்கும். மெலோடியான இசை, இதயப்பூர்வமான பாடல் வரிகள் மற்றும் வசீகரிக்கும் கிராஃபிக் காட்சிகள் மூலம் இந்தப்பாடலை ரசிகர்களின் மனதில் பதியவைத்திருக்கிறது யுவன் ஷங்கர் ராஜா, விஜய், வெங்கட்பிரபு கூட்டணி.  நிச்சயமாக ரிப்பீட் மோடில் பாடலைக் கேட்கலாம்!