ஏ.ஆர்.ரஹ்மான் மகள் கதீஜா - இயக்குநர் ஹலிதா ஷமீம் கூட்டணியின் ‘மின்மினி’... ட்ரெய்லர் எப்படி?!
தமிழ் சினிமாவின் நம்பிக்கைக்குரிய இயக்குநர்களில் ஒருவராக இடம்பிடித்திருப்பவர் ஹலீதா ஷமீம். இயக்குநர்கள் புஷ்கர் - காயத்ரியிடம் ‘ஓரம் போ’ படத்தில் உதவி இயக்குநராகப் பணியாற்றிய ஹலிதா ‘பூவரசம் பீப்பி' படத்தின் மூலம் இயக்குநராக அறிமுகமானார். ஓடிடி-யில் வெளியான ‘சில்லுகருப்பட்டி' படம் மூலம் கவனம்பெற்ற ஹலிதா சமுத்திரக்கனியின் நடிப்பில் ‘ஏலே’ என்கிற படத்தையும் இயக்கியிருக்கும் ஹலிதா இப்போது 'மின்மினி'யோடு வந்திருக்கிறார்.
மின்மினி படத்தின் ட்ரெய்லர் சற்று முன்பு யு-ட்யூபில் வெளியாகி நல்ல வரவேற்பை பெற்றுவருகிறது. ஆகஸ்ட் 9 ரிலீஸாக இருக்கும் ‘மின்மினி’ படத்தில் ‘பாபநாசம்' படத்தில் கமல்ஹாசனின் இரண்டாவது மகளாக நடித்த எஸ்தர் அணில் கதாநாயகியாக நடித்திருக்கிறார். ‘ஹாரி பாட்டர்' படம்போல படத்தின் ஒரு பாதியை ஒன்பது ஆண்டுகளுக்கு முன்பே 2015-ல் எடுத்துமுடித்துவிட்டார் ஹலிதா. அதில் நடித்த எஸ்தர், பிரவீன் கிஷோர், கெளரவ் உள்பட மற்ற நடிகர்கள் அனைவரும் வளரும் வரை காத்திருந்து 2022-ல் மீண்டும் படத்தை தொடங்கி ஷூட்டிங்கை முடித்திருக்கிறார்.
'மின்மினி' படத்தின் மூலம் ஏ.ஆர்.ரஹ்மானின் மகள் கதீஜா இசையமைப்பாளராக அறிமுகமாகிறார். சிறுவயதில் ஒரே பள்ளியில் படிக்கும் மூன்று நண்பர்களின் வாழ்க்கைப்பயணம்தான் கதை. ''இமயமலையும் ஒரு காலத்துல கடலா இருந்ததுதான். இப்ப இமயத்தைப்பாரு… எதுவுமே மாறும்தான… நான் மாற்றத்தை நம்புறேன்’’ என ‘மின்மினி’ படத்தின் ட்ரெய்லரில் இடம்பிடித்திருக்கும் இறுதி வசனங்கள் படத்தின் மீதான நம்பிக்கையை அதிகரித்திருக்கிறது!
வெல்கம்பேக் ஹலிதா!
