கோலிவுட்டில் இது கல்யாண சீசன்… பிரேம்ஜி, ஐஸ்வர்யா அர்ஜுன், வரலட்சுமி சரத்குமார் வரிசையில் அடுத்தது யார்?!

பிரேம்ஜி - இந்து

இசையமைப்பாளர் இளையராஜாவின் தம்பியும், கரகாட்டக்காரன் உள்ளிட்ட பல திரைப்படங்களின் இயக்குநருமான கங்கை அமரனின் இரண்டாவது மகன்தான் பிரேம்ஜி. மூத்த மகன் வெங்கட் பிரபு நடிகராக அறிமுகமாகி பின்னர் இயக்குநராகிவிட்ட நிலையில், தம்பி பிரேம்ஜி வல்லவன் படம் மூலம் நடிகரான அறிமுகமானார். தொடர்ந்து வெங்கட் பிரபுவின் படங்களில் காமெடி கதாபாத்திரங்களில் நடித்து சிரிப்பே வரவில்லையென்றாலும் காமெடி நடிகர் என்கிற அங்கீகாரத்தைபெற்றுவிட்டார் பிரேம்ஜி. தற்போது விஜய்யின் ‘GOAT’ படத்தில் நடித்திருக்கும் பிரேம்ஜிக்கு வயது 45.

கிட்டத்தட்ட 15 ஆண்டுகளுக்கு முன்பு மலேசியாவைச் சேர்ந்த ஒரு பெண்ணோடு பிரேம்ஜிக்கு திருமணம் நடப்பதாக இருந்து பின்னர் அது தள்ளிப்போனது. அதன்பிறகு பல்வேறு பெண் பார்த்தும் எதுவும் செட் ஆகாமல் போன நிலையில் கடந்த ஜூன் 9-ம் தேதி வெற்றிகரமாக இந்து என்கிற பெண்ணைக் கரம்பிடித்திருக்கிறார் பிரேம்ஜி. இந்து சினிமா, மீடியா சம்பந்தப்பட்டவர். சேலத்தைச் சேர்ந்த சராசரி குடும்பத்தைச் சேர்ந்தவர் என்பது குறிப்பிடத்தக்கது.

ஐஸ்வர்யா அர்ஜுன் - உமாபதி ராமையா

தம்பி ராமையாவின் மகனும் நடிகருமான உமாபதிக்கும், ஆக்‌ஷன் கிங் என புகழ்பெற்ற அர்ஜுனின் மகள் ஐஸ்வர்யாவுக்கும் ஜூன் 10-ம் தேதி சென்னையில் திருமணம் நடந்தது. இருவருக்கும் கடந்த ஆண்டு அக்டோபர் மாதமே நிச்சயர்தார்த்தம் நடைபெற்ற நிலையில் கிட்டத்தட்ட 8 மாதங்கள் கழித்து இப்போது திருமணம் நடைபெற்றிருக்கிறது. ஆஞ்சநேயரின் பக்தரான அர்ஜுன் சென்னையை அடுத்த கெருகம்பாக்கத்தில் உள்ள ஆஞ்சநேயர் கோயிலில் வைத்து மகளின் திருமணத்தை நடத்தியிருக்கிறார்.

வரலட்சுமி சரத்குமார்- நிக்கோலாய் சச்தேவ்

மும்பையைச் சேர்ந்த ஆர்ட் கேலரி உரிமையாளரான நிக்கோலாய் சச்தேவ் என்பவரை ஜூலை 2-ம் தேதி மணமுடிக்க இருக்கிறார் வரலட்சுமி சரத்குமார். கிட்டத்தட்ட 40 வயதாகும் வரலட்சுமி சரத்குமாருக்கு நடிகர் விஷாலுடன் திருமணம் நடக்க இருப்பதாக இருந்தது. வரலட்சுமியின் திருணம் எங்கே நடக்க இருக்கிறது என்பது இன்னுமே ரகசியமாக வைக்கப்பட்டிருக்கிறது. ஆனால், தமிழக முதலமைச்சர் மு.க.ஸ்டாலின் முதல் நயன்தாரா வரை பலரையுமே வரலட்சுமியின் திருமணத்துக்கு நேரில் போய் அழைத்திருக்கிறார் அப்பா சரத்குமார்.

தமன்னா - விஜய் வர்மா

தமிழ் சினிமாவில் கிட்டத்தட்ட 20 ஆண்டுகளாக பயணிக்கும் தமன்னாவுமே 35 வயதை நெருங்கிறார். பாலிவுட் நடிகர் விஜய் வர்மாவுக்கும் தமன்னாவும் காதலிக்கிறார்கள் என்கிற செய்தி பரவ ஆரம்பித்து பல மாதங்கள் ஆகும் நிலையில் இருவருக்கு இந்த ஆண்டு திருமணம் நடைபெற இருக்கிறது.

சித்தார்த் - அதிதி ராவ் ஹைதாரி

'பாய்ஸ்' படம் மூலம் ஹீரோவாக அறிமுகமான நடிகர் சித்தார்த்தும், ‘காற்று வெளியிடை’ படம் மூலம் தமிழ் சினிமா ரசிகர்களுக்கு அறிமுகமான அதிதி ராவ் ஹைதாரியும் இந்த ஆண்டு திருமண பந்தத்தில் இணைய இருக்கிறார்கள். நடிகர் சித்தார்த்துக்கு ஏற்கெனவெ திருமணமாகி விவகாரத்தானது குறிப்பிடத்தக்கது. ஸ்ருதிஹாசன், சமந்தா எனப்பல நடிகைகளுடன் ரிலேஷன்ஷிப்பில் இருந்த சித்தார்த் முதல்முறையாக அதிதியுடனான ரிலேஷன்ஷிப்பை உறுதிசெய்திருக்கிறார். அதிதி ராவ் தனக்கும் சித்தார்த்துக்கும் திருமண நிச்சயர்தார்த்தம் நடந்துவிட்டதாக இன்ஸ்டாகிராம் மூலம் கடந்த மார்ச் மாதம் அறிவித்திருந்தது குறிப்பிடத்தக்கது.

இவர்கள் தவிர நடிகை சுனைனா உள்பட தமிழ் சினிமா தொலைக்காட்சியைச் சேர்ந்த பலருக்கும் இந்த ஆண்டு திருமணம் நடக்க இருப்பது குறிப்பிடத்தக்கது.