விஜய்யுடன் மீண்டும் பூஜா ஹெக்டே...'அனிமல்' வில்லன்... டெய்லி அப்டேட்ஸ் வெளியிடும் படக்குழு!

வெங்கட் பிரபு இயக்கிய 'GOAT' படத்திற்குப் பிறகு நடிகர் விஜய் தனது கடைசிப் படத்திற்காக இயக்குநர் ஹெச். வினோத்துடன் கைகோர்த்துள்ளார். படத்தின் தலைப்பு தற்காலிகமாக 'தளபதி 69' என வைக்கப்பட்டுள்ளது.

இதற்கு முன்பு, இயக்குநர் வினோத் நடிகர் கமலுடன் இணைவதாக அறிவிக்கப்பட்டு கைவிடப்பட்ட கதைதான் நடிகர் விஜய்க்கு சொல்லி சம்மதம் வாங்கியிருக்கிறார் இயக்குநர் வினோத் என சொல்லப்படுகிறது.

படத்தின் முதல் பார்வை போஸ்டரில் நீலநிறப் பின்னணியில் விஜய் தீப்பந்தம் ஏந்தியிருக்கும்படி அமைக்கப்பட்டிருந்தது ரசிகர்கள் மத்தியில் கவனம் ஈர்த்தது. விஜய் தனது தவெக கட்சியின் முதல் மாநாட்டை இந்த மாதம் முடித்த பிறகு 'தளபதி 69' படத்தின் படப்பிடிப்பை தொடங்க இருக்கிறார்.

இந்த வருடம் ஆரம்பித்து அடுத்த வருடம் அக்டோபர் மாதம் படத்தை வெளியிட இருக்கிறார்கள். இந்த நிலையில், படத்தில் நடிக்கும் மற்ற நடிகர்கள் குறித்தான அறிமுக போஸ்டரை படக்குழு நேற்று முதல் தினமும் வெளியிடுவதாக அறிவித்தது. அந்த வகையில், 'தளபதி 69' படத்தில் 'அனிமல்' படப்புகழ் வில்லன் நடிகர் பாபி தியோல் இணைந்திருக்கிறார். இவர் நடிகர் சூர்யாவின் 'கங்குவா' படத்திலும் வில்லனாக நடித்திருக்கிறார். இப்போது 'தளபதி 69' படத்திலும் அவர் இணைந்திருப்பதால் விஜய்க்கு வில்லன் இவர்தான் எனத் தெரிகிறது.

அதேப்போல் 'பீஸ்ட்' படத்தில் விஜய்க்கு ஜோடியாக நடித்த பூஜா ஹெக்டே மீண்டும் இந்தப்படத்தில் கதாநாயகியாக இணைந்திருக்கிறார்!