திடீரென சரிந்து விழுந்த மேடை... காயத்துடன் தப்பித்த நடிகை பிரியங்கா மோகன்!
நடிகர்கள் ஜெயம் ரவி- பிரியங்கா மோகன் நடிப்பில் இந்த மாதம் ‘பிரதர்’ திரைப்படம் வெளியாக உள்ளது. இதற்கான ப்ரமோஷன் பணிகள் ஒருபக்கம் தீவிரமாக நடந்து வருகிறது. இந்த நிலையில், இன்று தெலங்கானா, தோரூரில் உள்ள வணிக வளாகம் ஒன்றின் திறப்பு விழாவிற்கு நடிகை பிரியங்கா மோகன் சிறப்பு விருந்தினராகக் கலந்து கொண்டிருக்கிறார்.
அங்கிருந்த மேடையில் நின்று ரசிகர்களுடன் பேசிக் கொண்டிருந்தபோது எதிர்பாராத விதமாக மேடை சரிந்து கீழே விழுந்திருக்கிறது. மேடையின் மீது நின்றிருந்த பிரியங்கா மோகன் உள்ளிட்ட அனைவரும் கீழே விழுந்திருக்கின்றனர்.
இதுதொடர்பான வீடியோ காட்சிகள் இணையத்தில் வைரலாகத் தொடங்கியது. அதிக எண்ணிக்கையிலான நபர்கள் மேடை மீது நின்றதும் எடை கூடியதால் மேடை சரிந்து விழுந்திருக்கிறது. இதில் பலருக்கும் காயம் ஏற்பட்டிருக்கிறது.
விபத்து தொடர்பாக தனது எக்ஸ் பக்கத்தில் பகிர்ந்துள்ள பிரியங்கா, தனக்கு சிறு காயங்கள் மட்டுமே ஏற்பட்டிருப்பதாகவும் தான் நலமுடன் உள்ளதாகவும் கூறியுள்ளார். விபத்தில் அடிபட்டவர்கள் விரைந்து குணமடையவும் தன்னைப் பற்றி நலம் விசாரித்தவர்களுக்கு நன்றி என்றும் சொல்லியுள்ளார்.
