Thangalaan Trailer Review : சூனியக்காரன் இல்ல... சூனியக்காரி?! பா.இரஞ்சித் - விக்ரமின் வெறித்தனம்!

ஞானவேல் ராஜா தயாரிப்பில் விக்ரம் நடிக்க, பா.இரஞ்சித் இயக்கும் படம் 'தங்கலான்'. கர்நாடகாவில் தமிழர்கள் அதிகம் வாழும்பகுதியான கோலார் தங்க வயலில் நடக்கும் கதைதான் 'தங்கலான்'. 

சுரங்கத்தில் தங்கம் தோண்டும் பணிகளுக்காக பிரிட்டிஷாரால் அழைத்துச்செல்லப்பட்ட தமிழர்களின் வாழ்க்கை சுரண்டப்பட்டதையும் அதை எதிர்த்து நிற்கும் தங்கலானின் வலி மிகுந்த போராட்டத்தையும் தன்னுடைய பாணியில் படமாக்கியிருக்கிறார் பா.இரஞ்சித்.

படத்தில் விக்ரமின் ஜோடியாக 'மாஸ்டர்' படத்தில் நடித்த மாளவிகா மோகனன் நடித்திருப்பதோடு, படத்தின் முக்கிய கதாபாத்திரத்தில் 'பூ', 'மரியான்' படங்களில் நடித்த பார்வதி நடித்திருக்கிறார். 

ட்ரெய்லர் என்ன சொல்கிறது?

மக்கள் கூட்டத்துக்குள் நுழையும் கறுஞ்சிறுத்தையுடன் ட்ரெய்லர் தொடங்குகிறது.குதிரையில் வரும் ஆங்கிலேயர்களை வெட்டி சாய்க்கும் காட்சியோடு விக்ரம் அறிமுகப்படுத்தப்படுகிறார். ‘’ஹிஸ் எக்ஸலென்சி லார்டு கிளெமென்ட் உங்க உபகாரம் வேண்டி உங்க கிராமத்துக்கு விஜயம் பண்ணியிருக்காரு’’ என்கிற அறிமுகத்தோடு வில்லன் என்ட்ரி கொடுக்கிறது.

இந்த வேலையை நாமதான் செய்யமுடியுமாம் என விக்ரம் சொல்லி தன் கிராம மக்களை லார்டு கிளமெண்ட் சொல்லும் இடத்துக்கு தங்கம் தோண்ட அழைத்துச்செல்கிறார். இதற்கிடையே ‘’இங்க பொண்ணை எடுக்கிறது நாம உயிரை நாமளே எடுக்கிறதுக்கு சமம்’’ என்கிற வசனம் இடம்பெறுகிறது.

இதுவரை சுரண்டப்பட்டவர்களின் வாழ்க்கையை காண்பிக்கும் படம் என்பதுபோல இருக்கும் ட்ரெய்லர் இதன்பிறகு வேறு ஒரு தளத்தில் வேகம் எடுக்கிறது.

‘’நீதானேயா பேய் இருக்குது பிசாசு இருக்குதுன்னு சொன்ன’’ என்கிற வசனத்தோடு அறிமுகமாகிறார் ‘பூ’ பார்வதி. சூனியக்காரன் இல்ல சூனியக்காரி… ஆரத்தி என சொல்ல சூனியக்காரியாக மாளவிகா மோகனன் அறிமுகமாகிறார். ‘’அந்த சூனியக்காரர்களை யாருமே கட்டவே முடியாதா’’ என காட்டுக்குள் கேள்வி ஒலிக்க, ‘’கட்டுவோம்… நான் கட்டுறேன்'’ என்கிறார் விக்ரம். ‘’சாவுக்குத் துணிஞ்சவனுக்கு மட்டும்தான் இங்க வாழ்க்கை’’ என்கிற வசனத்தோடு ட்ரெய்லர் முடிகிறது.

'தங்கலான்' படத்தின் ட்ரெய்லர் கதை என்ன என்பதை யூகிக்க முடியாத திருப்பங்களுடனும், பரபரப்பான கதைக்களத்துடனும் இருக்கும் என்பதைச் சொல்கிறது!

'தங்கலான்' படத்தின் படப்பிடிப்பு 2022-ம் ஆண்டு தொடங்கி 2023 ஜூலையில் முடிவடைந்துவிட்டது. இந்த ஆண்டு ஜனவரி மாதம் 26-ம் தேதி உலகம் முழுக்க படம் ரிலீஸாகும் என அறிவிக்கப்பட்ட நிலையில் படத்தில் கிராஃபிக்ஸ், அனிமேஷன் வேலைகள் முடிவடையாததால் ரிலீஸ் தள்ளிக்கொண்டேபோக, இறுதியாக இன்று ட்ரெய்லர் வெளியாகியிருக்கிறது. படம் ஆகஸ்ட் 15-ம் தேதி ரிலீஸாகிறது.