பிக் பாஸில் என்ட்ரி தரும் விஜய்சேதுபதி மகன்; இது என்ன புது ட்விஸ்ட்?!

நடிகர் விஜய் சேதுபதி பிக் பாஸ் தமிழின் எட்டாவது சீசனை தொகுத்து வழங்கி வருகிறார். தொகுப்பாளராக நடிகர் கமல்ஹாசனுக்கு பதிலாக விஜய்சேதுபதி நிகழ்ச்சியை எப்படி தொகுத்து வழங்குவார் என்ற பெரும் எதிர்பார்ப்பு பிக் பாஸ் ரசிகர்கள் மத்தியில் இருந்தது.

கமல்ஹாசனுடைய பாணியை அப்படியே பின்பற்றாமல் தனக்கே உரிய இயல்பான பாணியில்விஜய் சேதுபதி நிகழ்ச்சியை நன்றாக கொண்டு செல்கிறார் என்ற பல பாசிட்டிவான விமர்சனங்களை கேட்க முடிகிறது. இது மட்டுமல்லாது, நிகழ்வில் கலந்து கொண்ட போட்டியாளர்களை கணித்து வெளிப்படையாகப் பேசுவதும் பாராட்டப்படுகிறது. 'மகாராஜா' படத்தில் விஜய் சேதுபதியின் மகளாக நடித்த நடிகை சாச்சனாவும் பிக் பாஸ் வீட்டிற்குள் சென்று இருக்கிறார். மேடையில் போட்டியாளர் அறிமுகத்தின்போது சாச்சனா மீதான மகள் பாசத்தை வெளிப்படுத்தி இருந்தார் விஜய் சேதுபதி.

இப்போது விஜய் சேதுபதியுன் மகன் சூர்யாவும் பிக் பாஸ் வீட்டிற்குள் நுழைகிறார். அதாவது, சூர்யா கதாநாயகனாக ஸ்டன்ட் மாஸ்டர் அனல் அரசு இயக்கத்தில் நடித்திருக்க கூடிய படம் 'ஃபீனிக்ஸ் வீழான்'. இந்தப் படம் நவம்பர் மாதம் 14-ம் தேதி திரையரங்குகளில் வெளியாக இருக்கிறது. இந்த படத்தின் புரோமோஷன் பணிகளை ஒட்டியே அவர் பிக் பாஸ் வீட்டிற்குள் நுழைகிறார் என சொல்லப்படுகிறது. தனது தந்தை பெயரை எந்த இடத்திலும் பயன்படுத்த மாட்டேன் என்று முன்பு சூர்யா சொல்லியிருந்தார். ஆனால், இப்போது பட புரமோஷனுக்காக வருகிறாரா என ரசிகர்கள் பலரும் கேள்வி எழுப்பி வருகின்றனர்.