'GOAT' படத்தின் வெற்றி விழா நடக்குமா... விஜய் சொல்வது என்ன?

வெங்கட்பிரபு இயக்கத்தில் நடிகர்கள் விஜய், பிரஷாந்த், பிரபுதேவா, ஸ்னேகா, லைலா உள்ளிட்டப் பலர் நடிப்பில் 'GOAT' படம் இந்த மாதத் தொடக்கத்தில் வெளியானது. படம் வெளியாவதற்கு முன்பு உலகம் முழுவதும் நிச்சயம் 1000 கோடி ரூபாய் வசூலிக்கும் என படக்குழு நம்பிக்கை தெரிவித்தது.

படம் கலவையான விமர்சனங்களைப் பெற்றாலும் உலகம் முழுவதும் சுமார் 500 கோடி ரூபாய் வசூலைப் பெற்றிருக்கிறது. இந்தப் படத்திற்கென இசை வெளியீட்டு விழா பிரமாண்டமாக நடக்கும் என ரசிகர்கள் எதிர்பார்த்திருந்தனர். ஆனால், விஜய் தரப்பில் இருந்து சம்மதம் தெரிவிக்காமல் இருந்ததால் இசை வெளியீட்டு விழா நடக்கவில்லை.

ஆனால், நிச்சயம் படத்தின் வெற்றி விழா பிரமாண்டமாக நடக்கும் என இயக்குநர் வெங்கட்பிரபு தெரிவித்திருந்தார். இதற்கு முன்பு விஜய்யின் ‘லியோ’ படத்திற்கும் இசை வெளியீட்டு விழா நடத்தாமல் வெற்றி விழா நடத்தினார்கள் என்பது குறிப்பிடத்தக்கது. இதேபாணியை பின்பற்றுவதாகத்தான் இயக்குநர் வெங்கட்பிரபுவும் தெரிவித்திருந்தார்.

ஆனால், இப்போது வெற்றி விழா நடப்பது சந்தேகம் என்கின்றனர். ஏனெனில், விஜய் தற்போது தமிழக வெற்றிக் கழகத்தின் மாநாட்டு பணிகளில் பிஸியாக இருக்கிறார். மாநாடு முடித்த கையோடு அடுத்து ஹெச்.வினோத் படமும் தொடங்க இருப்பதால் வெற்றி விழா நடப்பது கடினம் என்கிறது கோலிவுட் தரப்பு.