Budget 2024 Live : மோடி ஆட்சி தொடர உதவும் பீகார், ஆந்திர பிரதேசத்துக்கு சிறப்பு சலுகைகள்!

பட்ஜெட்டை நாடாளுமன்றத்தில் தாக்கல் செய்வதற்கு முன்னதாக குடியரசுத்தலைவர் திரெளபதி முர்முவைச் சந்தித்து ஒப்புதல் பெற்றார் நிதியமைச்சர் நிர்மலா சீதாரமன். குடியரசுத்தலைவர் அமைச்சருக்கு இனிப்பு ஊட்டி வாழ்த்து தெரிவித்தார்.

மொரார்ஜி தேசாயின் சாதனையை முறியடித்து தொடர்ந்து ஏழாவது முறையாக மத்திய பட்ஜெட்டைத் தாக்கல் செய்கிறார் நிர்மலா சீதாராமன்.

பட்ஜெட் 2024 : பட்ஜெட் உரையைத் தொடங்கினார் நிர்மலா சீதாராமன். இந்தியாவின் வளர்ச்சி மிகச்சீராக இருப்பதாகப் பெருமிதம்!

பட்ஜெட் 2024 : இளைஞர்களுக்கான வேலைவாய்ப்பு, கல்வி மற்றும் திறன் மேம்பாட்டுக்கு 1.48 லட்சம் கோடி ஒதுக்கீடு செய்யப்படுகிறது.

1 கோடி விவசாயிகள் இயற்கை விவசாயம் பக்கம் திருப்பிவிடப்படுவார்கள்.

உள்ளூர் கல்வி நிறுவனங்களில் உயர்கல்வி பயிலும் மாணவர்களுக்கு 10 லட்சம் வரை கல்விக்கடன் வழங்கப்படும்.

மோடி 3.0 அரசு ஆட்சியில் தொடர காரணமாக இருக்கும் நித்திஷ் குமார் ஆட்சியில் இருக்கும் பீகாருக்கும், சந்திரபாபு நாயுடு ஆட்சியில் இருக்கும் ஆந்திர பிரதேசத்துக்கும் சிறப்பு சலுகைகள் அறிவிக்கப்பட்டிருக்கிறது.

பிரதம மந்திரி ஆவாஸ் யோஜனா திட்டத்தின் கீழ் 3 கோடி வீடுகள் கட்ட நிதி வழங்கப்படும்.

பீகாரில் சாலைகள், மேம்பாலங்கள், ஸ்டேடியங்கள் கட்ட 26,000 கோடி ரூபாய் ஒதுக்கீடு. வெளிநாடுகளில் இருந்து கடன்பெற்று பீகார் மாநிலத்தின் முன்னேற்றத்துக்கு உதவி செய்யவும் உறுதி.

இளைஞர்களுக்கு அரசு, தனியார் நிறுவனங்களில் இன்டர்ன்ஷிப் முறையில் வேலை வழங்கப்பட்டும் மாதம் 5000 ரூபாய் சம்பளம் வழங்கப்படும்.

பீகார், அசாம், உத்தராகண்ட் மாநிலங்கள் தொடர்ந்து வெள்ளத்தால் பாதிக்கப்படுவதாகவும், அந்த மாநிலங்களுக்கு மத்திய அரசு வெள்ளத்தை தடுக்கவும், நிவாரணம் வழங்கவும் நிதி ஒதுக்கீடு செய்யும் எனவும் அறிவிப்பு. ஆனால், கடந்த ஆண்டு வெள்ளத்தால் சென்னை, தூத்துக்குடி பாதிக்கப்பட்டபோதும் தமிழ்நாட்டுக்கு மத்திய அரசு நிவாரணம் வழங்கப்படும் என பட்ஜெட்டில் சொல்லப்படவில்லை.

பீகார், ஒடிசாவில் உள்ள பழமையான கோயில்களை பாதுகாக்கவும், பராமரிக்கவும் சிறப்பு நிதி ஒதுக்கீடு!

பட்ஜெட் அறிவிப்பு வெளியாகிவரும் நிலையில் உயரும் என எதிர்பார்க்கப்பட்ட பங்குச்சந்தை மார்க்கெட் இறங்குமுகமாகவே இருக்கிறது.

நிர்மலா சீதாராமன் பட்ஜெட் உரையை வாசிக்க ஆரம்பித்து ஒரு மணி நேரத்துக்கு மேலாகியும் தமிழ்நாட்டுக்கென எந்த சிறப்பு திட்டமும் அறிவிக்கப்படவில்லை.

செல்போன், செல்போன் சார்ஜர்களுக்கான உற்பத்தி வரி 15 சதவிகிதம் வரை குறைக்கப்படும்.

வெளிநாட்டில் இருந்து இறக்குமதி செய்யப்படும் புற்றுநோய் மருந்துகளுக்கு வரிவிலக்கு அளிக்கப்படும்.

தங்கம், வெள்ளி, பிளாட்டினம் மீதான சுங்க வரி குறைக்கப்படுகிறது.

பிளாஸ்டிக் மீதான சுங்கவரி உயர்த்தப்படுகிறது.

ஸ்டார்ட்அப் நிறுவனங்களுக்கு விதிக்கப்பட்டுவந்த ஏஞ்சல் வரி முழவதுமாக நீக்கம்!

3 லட்சம் வரை வருமானம் பெறும் தனிநபர்களுக்கு வருமான வரி இல்லை. 15 லட்சத்துக்கு மேல் ஆண்டு வருமானம் பெறுபவர்களுக்கு 30 சதவிகிதம் வருமான வரி விதிப்பு! 3-7 லட்சம் வருமானம் பெறுபவர்களுக்கு 5 சதவிகிதமும், 7-10 லட்சம் வருமானம் பெறுபவர்களுக்கு 10 சதவிகிதமும், 10-12 லட்சம் வருமானம் பெறுபவர்களுக்கு 15 சதவிகிதமும், 12-15 லட்சம் வருமானம் பெறுபவர்களுக்கு 20 சதவிகிதமும் வருமான வரி விதிப்பு