கிரிக்கெட் வீரர்களுடன் போட்டோ எடுத்த மோடி... மும்பை வான்கடேவில் உலகக்கோப்பை வெற்றிப்பேரணி!
தனி விமானம் மூலம் இன்று காலை டெல்லி வந்திறங்கிய ரோஹித் ஷர்மா தலைமையிலான இந்திய கிரிக்கெட் வீரர்களை சந்தித்து விருந்தளித்திருக்கிறார் பிரதமர் மோடி.
இன்று காலை விமானநிலையத்தில் இருந்து நேரடியாக ஐடிசி மெளரியா ஹோட்டலுக்குச் சென்ற இந்திய வீரர்களுக்கு உற்சாகமான வரவேற்பு அளிக்கப்பட்டது. பின்னர் உலகக்கோப்பை வடிவில் தயாரிக்கப்பட்டிருந்த கேக்கை ரோஹித் ஷர்மா வெட்ட, பின்னர் இந்திய அணியினர் டெல்லியில் உள்ள பிரதமர் மோடியின் இல்லத்துக்குச் சென்றனர்.
கிரிக்கெட் வீரர்களை சந்தித்து மதிய உணவு விருந்தளித்த மோடி, ‘’உலகக்கோப்பை போட்டிகளின்போது நடந்த சுவாரஸ்யமான அனுபவங்களை வீரர்களிடம் கேட்டறிந்தேன்'’ எனக் குறிப்பிட்டிருக்கிறார்.
இந்நிகழ்வின்போது பிசிசிஐ சார்பில் அதன் தலைவர் ரோஜர் பென்னியும், செயலாளர் ஜெய் ஷாவும் மோடிக்கு ‘NAMO’ எனப்பெயர்பொறித்த நம்பர் 1 இந்தியன் டீம் ஜெர்சியைப் பரிசாக அளித்தனர்.
விருந்து நிகழ்ச்சிக்குப் பின்னர் மும்பை விமானம் ஏறியிருக்கும் இந்திய வீரர்கள் மாலை 5 மணிக்கு வான்கடேவில் நடக்க இருக்கும் நிகழ்ச்சியில் கலந்துகொள்ள இருக்கிறார்கள்.
