பாகிஸ்தான் கேப்டனின் காமெடிகள்… ரிவியூ எடுக்கலாமா என ஆஸ்திரேலிய பேட்ஸ்மேனிடமே கேட்ட முகமது ரிஸ்வான்!

ஆஸ்திரேலியா, பாகிஸ்தான் இடையே மூன்று ஒருநாள் போட்டிகள் கொண்ட தொடர் ஆஸ்திரேலியாவில் நடந்து வருகிறது. முதல் ஒருநாள் போட்டியை ஆஸ்திரேலியா வென்றுவிட்ட நிலையில் இரண்டாவது ஒருநாள் போட்டி இன்று அடிலெய்டில் நடந்துவருகிறது.

முதலில் பேட்டிங் செய்த ஆஸ்திரேலிய அணியின் பேட்டிங்கை சிறப்பான பந்துவீச்சால் துவம்சம் செய்தார் பாகிஸ்தான் வேகப்பந்து வீச்சாளர் ஹாரிஸ் ரவுஃப். 5 விக்கெட்டுகளை முகமது ரவுஃப் எடுக்க, ஷாஷின் ஷா அஃப்ரிடி மூன்று விக்கெட்கள் எடுத்தார்.

ஆஸ்திரேலிய இன்னிங்ஸின்போது சுவாரஸ்ய சம்பவமாக சுழற்பந்து வீச்சாளர் ஆடம் ஸாம்பாவுக்கு, நஸீம் ஷா பந்துவீசினார். அப்போது பந்து பவுன்சாகி ஆடம் ஸாம்பாவின் பேட்டை உரசுவதுபோலச் சென்று பாகிஸ்தான் கேப்டனும் விக்கெட் கீப்பருமான முகமது ரிஸ்வானிடம் போனது. இதை கேட்ச் என ரிஸ்வான் உள்ளிட்ட வீரர்கள் அப்பீல் செய்ய அம்பயர் அவுட் கொடுக்கவில்லை.

இந்நிலையில் கேப்டனான ரிஸ்வான், பேட்ஸ்மேனான ஆடம் ஸாம்பாவைப் பார்த்து சத்தம் எதுவும் கேட்டதா என அவரிடமே கேட்க,  ஸாம்பா ரிஸ்வானிடம் ‘’நீங்கள் எதற்கெடுத்தாலும் ரிவியூ கேட்கிறீர்கள்’’ எனச்சொல்ல, அப்போதும் ரிஸ்வான் விடாமல் ஸாம்பாவிடமே ரிவியூ கேட்கலாமா என மீண்டும் கேட்க, ‘’நிச்சயமா நீங்க கேட்கணும்’’ என ஸாம்பா சொல்ல, ரிஸ்வான் ரிவியூ கேட்டார். ரிவியூவில் பந்து பேட்டில் படவில்லை என்பது தெரியவந்தது.

ஆடம் ஸாம்பா நக்கலாகச் சொல்கிறார் என்பதுக்கூடப் புரியாமல் பாகிஸ்தான் கேப்டன், பேட்ஸ்மேனிடமே ரிவியூ கேட்கலாமா எனக் கேட்டது வைரலாகப் பரவிவருகிறது.