விஜய் சேதுபதியின் பிக் பாஸ் 8 அக்டோபர் 6 முதல்... ப்ரோமோ ரிலீஸ் எப்போது தெரியுமா?! #EXCLUSIVE
விஜய் டிவி பிக்பாஸ் 8 சீசனுக்காக பரபரப்பாக தயாராகி வருகிறது. தெலுங்கில் நாகார்ஜுனா தொகுப்பாளராக இருந்து நடத்தும் பிக்பாஸ் சீசன் 8 செப்டம்பர் 1 முதல் தொடங்கிவிட்டது. தற்போது தமிழில் சீசன் 8-ஐ தொடங்குவதற்கான வேலைகள் நடந்துவருகின்றன. இதுவரை பிக்பாஸ் நிகழ்ச்சியை தொகுத்து வழங்கிய கமல்ஹாசன் இந்த சீசனில் விலகிக்கொண்டதால் அவருக்கு பதிலாக விஜய் சேதுபதி பிக்பாஸாக நிகழ்ச்சியைத் தொகுத்து வழங்க இருக்கிறார்.
விஜய் சேதுபதியை பிக்பாஸ் தொகுப்பாளராக அறிவிக்கும் அதிகாரப்பூர்வ ப்ரோமோவின் ஷூட்டிங் கடந்த வாரம் பாண்டிச்சேரியில் நடைபெற்றது. இந்த ப்ரோமோவின் இறுதிகட்ட எடிட் நடந்துவரும் வேளையில் எப்போது வேண்டுமானாலும் ப்ரோமோ வெளியாகலாம்.
இந்த வார இறுதிக்குள் அதாவது வரும் வெள்ளிக்கிழமை செப்டம்பர் 6-ம் தேதி ப்ரோமோ வெளியாகிவிடும் என்கிறார்கள் விஜய் டிவிக்கு நெருக்கமானவர்கள்!
இதற்கிடையே பிக் பாஸ் சீசன் 8 நிகழ்ச்சி அக்டோபர் 6 முதல் தொடங்கி அடுத்த ஆண்டு ஜனவரி 15-ம் தேதி பொங்கல் வரை நடைபெற இருக்கிறது. அக்டோபர் 6 முதல் பிக் பாஸ் நிகழ்ச்சியின் ஒளிபரப்பு தொடங்குவதால் விஜய் டிவி சீரியல்களின் நேர மாற்றமும் நிகழ இருக்கிறது. 9.30 மணிக்கு ஒளிபரப்பாகும் 'சின்ன மருமகள்' மற்றும் 10 மணிக்கு ஒளிபரப்பாகும் 'நீ நான் காதல்' தொடர்களின் ஒளிபரப்பு நேரம் மாற்றப்பட இருக்கிறது!
