இந்த வாரத்துக்கான கேப்டன் டாஸ்கில் ரஞ்சித்தும் தர்ஷிகாவும் நேரடியாக மோதுகிறார்கள். இவர்களில் வெற்றி யாருக்கு ? மளிகை டாஸ்கில் பெண்களும் ஆண்களும் செய்த சம்பவம், இந்த வாரம் நாமினேஷன் ஆகப் போவது யார் என்ற பல எதிர்பார்ப்புகளை கொண்டிருந்தது இன்றைய பிக்பாஸ் . இது BB Tamil 08 Day 15 .
பிக்பாஸ் வீட்டிலிருப்பவர்கள் சினிமா பார்த்து கெட்டுப் போயிருக்கிறார்கள் போல. எப்போதுமே, சதித் திட்டங்களை இரவு நேரத்திலேயே திட்டமிடுகிறார்கள். பெண்கள் வீட்டில் முத்துக்குமரன் செய்த ஜோக்கர் - செஸ் வன்மத்தை பக்கோடாவை மெல்லுவது போல மென்று சிரித்துக் கொண்டிருந்தனர் பெண்கள்.
‘செஸ் விளையாடவே தெரியாதுடி எனக்கு’ என ஜாக்குலின் கூறும் போது, ‘பாவமா தான் இருந்துச்சு.. பாயாசம் நல்லா இருக்குனு இன்னொரு க்ளாஸ் கேட்கும் போது..’ எனும் காமெடி தான் நினைவுக்கு வருகிறது.
நேற்றைய எபிசோடுக்கு இடைஇடையே பெண்கள் முத்துக்குமரனை பற்றி பேசுகின்றனர். 24/7 இல் சில காட்சிகளில் பெண்கள் முத்துவை பற்றி பாசிட்டிவாக பேசுகின்றனர். ஆனந்தி, சுனிதா, ஜாக்குலின் ஆகியோர் முத்துவின் கேம் பிளான் பிடிச்சிருக்கு என்கின்றனர். ஜாக்குலின் முத்துவிடம் பேசி சமாதானம் ஆகிறார். இருவரும் சேர்ந்து விளையாடலாம் என்று திட்டமிடுகின்றனர். முத்து தவிர்க்க முடியாத பலமான போட்டியாளர் என பெண்கள் அணியில் சிலர் புரிந்து கொண்டனர். தர்ஷிகாவுக்கு தான் பெஸ்ட் என்று கொஞ்சம் தலைகனம் உள்ளது, பவித்ராவுக்கு முத்து மீது ஈகோ உள்ளது வெளிப்படையாக தெரிகிறது.
பெண்கள் விட்டிலிருந்து ஆண்கள் வீட்டுக்குச் செல்ல சாச்சனா, செளந்தர்யா இடையே போட்டி நிலவியது. அதுபோல, பெண்கள் வீட்டுக்குப் போகப் போவது சத்யாவா அல்லது ஜெஃப்ரியா எனும் குழப்பம் ஆண்கள் வீட்டில் !
கோரிக்கையை மறுத்துவிட்ட அணிகள்!
செளந்தர்யாவுக்கு ஒரு கம்ஃபர்ட் தேவைப்படுகிறது. ஆண்கள் வீட்டுக்குச் சென்றால் நிம்மதியாக இருக்கலாம். ஆண்களால் தொல்லை இருக்காது. பெண்களிடம் பெயர் டேமேஜ்ஜாகி இருப்பதால் ஆண்கள் வீட்டுக்குள் தஞ்சம் புக நினைக்கிறார் செளந்தர்யா. பாயாசம் பஞ்சாயத்தில் சுனிதா, ‘சுயநலவாதி’ என திட்டியதையும் ஏற்றுக் கொள்ள முடியாமல் புலம்பிக் கொண்டிருக்கிறார் சவுண்ட். ஆனால், ஆண்கள் வீட்டுக்குச் செல்ல பெண்களின் தேர்வாக சாச்சனா இருந்தார்.
சத்யாவுக்கு பெண்கள் வீட்டுக்குள் ஒரு ட்ரிப் அடிக்க ஆசை. ஆண்கள் டீமிலேயே பகைமையும் விரிசலும் விழுவதால் ஒரு வாரம் அங்கே போக விரும்புகிறார். அதோடு, பலம் சார்ந்த டாஸ்களில் சத்யாவின் பங்கு அதிகமாக இருக்கும். அதனால், சத்யாவின் முகம் வெளியே தெரியும். பெண்களால் தரப்பட்ட டூப் பெயரை அவர்கள் இடத்திலேயே உடைத்தெறிய நினைக்கிறார். ஆனால், பெண்கள் வீட்டுக்குச் செல்ல ஆண்களின் தேர்வாக ஜெஃப்ரி இருந்தார்.
இந்த வாரத்துக்கான SWAP-ல் ஜெஃப்ரியும், சாச்சனாவும் வலது கால் வைத்து இடம் மாறினர். ஜெஃப்ரி ஏற்கெனவே பெண்கள் வீட்டில் தான் லிவிங்ஸ்டன். அதனால், ஜெஃப்ரிக்கு இந்த இடமாற்றம் பெரிய மாற்றத்தை தரப் போவதில்லை.
அதுபோல, சாச்சனாவுக்கு ஆதரவு கரம் கொடுப்பது ஆண்கள் தான். அதனால், சாச்சனாவும் அதைப் பயன்படுத்தி கேம் ஆட நினைத்திருக்கிறார். இந்த வாரம் இருவரின் ஆட்டமும் எப்படி இருக்கிறதென பொருத்திருந்துப் பார்க்கலாம்.
தலைவனா தலைவியா ?
இந்த வாரத்துக்கான கேப்டன் டாஸ்கிற்கு ரஞ்சித்தும், தர்ஷிகாவும் நேரடியாக களத்தில் இறங்கினர். டாஸ்கின் பெயர் குவாக் குவாக். போட்டியாளர்களின் முகத்தில் கருப்பு துணி கட்டப்பட்டது. களத்தில் இருப்பவர்கள் காலில் வாத்து பொம்மை கட்டப்பட்டது. கண்களை மூடிக் கொண்டு அவர்களை சாஃப்ட் பேட்டால் அடித்து அவுட் செய்ய வேண்டும். அதிகமாக அவுட் செய்யும் நபரே வெற்றி பெறுவார்கள். சீனாவில் ஃபேமஸான கேம் இது. இந்த விளையாட்டை செம ஆக்டிவாக விளையாடினார் தர்ஷிகா. தரையில் உருண்டுபிரண்டு குட்டிகரனம் அடித்தும் தோற்றார் ரஞ்சித்.
தர்ஷிகாவிடம் இருந்த வேகம் ரஞ்சித்திடம் இல்லை என்பதால் இந்த வாரத்தின் கேப்டன் குயினாக தர்ஷிகா தேர்வானார். இரண்டாவது முறையாக கேப்டன் ஆகியிருக்கிறார். அதோடு, இந்த கேப்டன் பதவியானது பெண்கள் டீமுக்கு கூடுதல் ப்ளஸ். அதோடு, இந்த வார நாமினேஷனிலிருந்தும் தப்பித்துவிட்டார் தர்ஷிகா. வெல் கேம் !
செளந்தர்யாவை ஓரம் கட்டும் பெண்கள் டீம்.
செளந்தர்யாவை மூன்று விஷயங்களுக்கு கேள்வியெழுப்பியது பெண்கள் டீம். ஒன்று, ஆண்கள் வீட்டுக்கு போக வேண்டுமென்ற கோரிக்கையை ‘உன் மீது நம்பிக்கை இல்லை’ என ஒரே போடு போட்டு உடைத்தனர். இரண்டாவது, ரேஷன் டாஸ்கில் பங்குபெற வேண்டுமென்ற கோரிக்கையையும் ஏற்றுக்கொள்ளவில்லை.
பருப்பு, கடுகுக்கு வித்தியாசம் தெரியுமா என்று கேட்டார்கள். கத்துக்குறேன். பார்த்துட்டுப் போறேன்னு சொன்னப் பிறகு வழியின்றி சம்மதித்தது. அதோடு, பாயாசம் விஷயத்தில் நடந்து கொண்டதையும் கண்டித்து செளந்தர்யாவை டயர்ட் ஆக்கிவிட்டது பெண்கள் டீம். எல்லாவற்றுக்கும் பெண்களிடம் பிச்சை எடுக்க வேண்டி இருக்கிறது என்று செளந்தர்யா புலம்புகிறார். இந்த விஷயத்தை வார இறுதியில் விசே சுட்டிக் காட்டவும் வாய்ப்பிருக்கிறது.
இந்த வார நாமினேஷன்
சென்ற வாரம் வீடு மாறி விளையாடிய தர்ஷா நேரடி நாமினேஷனில் அருணையும், தீபக் தர்ஷாவையும் நேரடியாக நாமினேஷனுக்கு அனுப்பினர். அதோடு, இந்த வாரம் யாரை யார் வேண்டுமென்றாலும் நாமினேட் செய்யலாம் என்ற ரூலையும் போட்டார் பிக்பாஸ். அதனால், பெண்களே பெண்களை நாமினேட் செய்த சம்பவத்தையும் பார்க்க முடிந்தது.
பெரும்பாலும் செளந்தர்யாவுக்கு வேட்டு வைத்தனர். இறுதியாக, ஜாக்குலின்- 05 , அன்ஷிதா- 05 , பவித்ரா - 02, சத்யா - 05 , முத்து - 02 மற்றும் செளந்தர்யா- 06 ஓட்டுகளுடன் நேரடி நாமினேஷனில் வந்த தர்ஷா & அருண் ஆகியோர் இந்த வாரம் நாமினேஷனுக்கு தேர்வானார்கள்.
இந்த முறையும் அதிக ஓட்டு பெற்று நாமினேட் ஆனதால் செளந்தர்யா அழத் துவங்கினார். வழக்கம் போல, ஜெஃப்ரி ஆறுதல் கூறினார். ‘அழுதா அழகா இருக்க’ன்னு சொல்ல அர்னவ் தான் மிஸ்ஸிங் ! சில நேரங்களில் ஓவியா போல முயற்சி செய்கிறார்களோ என்றே தோன்றுகிறது.
பெண்களுக்கு ஆண்கள் வைத்த செக்
பிக்பாஸ் வீட்டுக்குள் வந்த முதல் நாளில் வீடு பிடிக்கும் ஆட்டத்தில் பெண்களுக்காக தனி பெட் இருக்கும் வீட்டினை விட்டுக் கொடுத்ததுக்கு பதிலாக, ஆண்களில் யாரையும் ஒரு வாரம் முழுவதும் நாமினேட் செய்யக் கூடாது எனும் டீலை வாங்கி வைத்திருந்தனர் ஆண்கள்.
அதனால், அந்த ‘நோ நாமினேஷன்’ வாய்ப்பை இப்போது பயன்படுத்திக் கொள்ள நினைக்கிறது ஆண்கள் டீம். இந்த விஷயத்தை கேப்டன் தர்ஷிகா மூலமாக பற்ற வைத்தார்கள் ஆண்கள். இந்த விஷயம் புகையாக மூண்டு வர ஆரம்பித்திருக்கிறது. அதை ஒப்புக் கொள்ள பெண்கள் டீம் மறுப்பதோடு அந்த டீலுக்கு பதிலாக வேறு எதாவது செய்யலாம் என நினைக்கிறார்கள் பெண்கள். இதற்கான முடிவு நாளை சொல்வதாக பெண்கள் கூறியிருக்கிறார்கள்.
ஷாப்பிங் டாஸ்க் :
கடும் போராட்டங்களுக்குப் பெறகு, ஆண்கள் 5500 , பெண்கள் 2000 பிக்பாஸ் கரன்சியை வென்றார்கள். இதற்குள் தான் ஷாப்பிங் செய்தாக வேண்டும் என்று பிக்பாஸ் முடிவெடுத்தார். இந்த டாஸ்கில் பெண்கள் அணி நிலைமை தான் கவலைக்கிடம். ஏனெனில், 2000 ரூபாய்க்கு என்ன வாங்க போறோம் என்று தெரியாமல் புலம்பிக் கொண்டனர்.
இறுதியாக, ஷாப்பிங் செய்ய விஷால், முத்துக்குமரன், அருண் மற்றும் பெண்கள் அணியிலிருந்து அன்ஷிகா, ஜாக்குலின், செளந்தர்யா சென்றனர். சென்ற வாரம் 8000 வென்று 12 ஆயிரத்துக்கு ஷாப்பிங் செய்து சம்பவம் செய்த ஆண்கள் டீம் இந்த வாரம் என்ன செய்து வைத்திருக்கிறது என்பது தெரியவில்லை. அதுபோல, 4000 வென்று 2000 ஷாப்பிங் செய்த அணி, இந்த வாரம் 2000 வென்று 1000க்கு மட்டும் ஷாப்பிங் செய்திருக்கிறார்களா என்றும் தெரியவில்லை. இறுதியாக, ரிசல்ட் வந்தது. அதில் ஆண்கள் 3820க்கும் பெண்கள் 2190க்கு ஷாப்பிங் செய்தனர். 2000க்கு வென்று அதற்கு மேல் ஷாப்பிங் செய்த பெண்கள் டீமை வார்னிங்குடன் ஒழுங்கா ஷாப்பிங் செய்யுங்க என்று விட்டு விட்டார் பிக்பாஸ்.
கேப்டனாக தர்ஷிகா பகையை சம்பாதிக்காமல் தப்பிப்பாரா, நாமினேஷனில் இருக்கும் நபர்கள் கண்டெண்டுக்காக போடப் போகும் போட்டா-போட்டி , வீக்லி டாஸ்கில் வெல்லப் போவது யாரென்ற எதிர்பார்ப்புடன் முடிந்தது இன்றைய நாள் ! மொத்தத்தில் இன்றைய நாள் ‘குட் ஒன்’ ஃபீல் தான்.